Inkludering i arbeidslivet løyser store samfunnsproblem

Her er nokre tal:

• Om lag 15 % av befolkninga 15-66 år definerer seg sjølve som funksjonshemma.
• Færre er i arbeid i denne gruppa enn i befolkninga totalt: 42,7 prosent mot 74,2 prosent.
• Blant dei funksjonshemma som ikkje er i jobb, seier ein av fire at dei ønskjer arbeid. I andre kvartal 2013 svarte dette til 86 000 personar.
• Kjelde: SSB arbeidskraftundersøking

Vi har alle ulike føresetnader

Omgrepet nedsett funksjonsevne blir ofte nytta om dei som står utanfor arbeidslivet. Orda vi brukar er omstridt, og det er ikkje snakk om ei einsarta gruppe. Det kan være tale om personar med dårleg funksjonsevne og store helseproblem, men også menneske med god helse og berre små funksjonshemmingar. Det kan være både fysiske og psykiske årsakar til at folk står utanfor. For nokon er problemet varig, for andre berre midlertidig. Alle har ei funksjonsevne som varierer gjennom livet. Det viktige er at nedsett funksjonsevne ikkje er det same som nedsett arbeidsevne. Med tilrettelegging kan ein stor del av oss fungere godt i arbeid.

Mange gode grunnar til å prøve

Mange verksemder klarar å inkludere menneske med ulike føresetnader. Felles for desse er først og fremst viljen til å prøve. Nokre verksemder ønskjer å ta samfunnsansvar og være med på å løyse eit samfunnsproblem. Andre har innsett at kompetanse, motivasjon og arbeidsevne er viktigare enn funksjonsevne og helseproblem. Dei finn verdifulle medarbeidarar i ei gruppe som ofte blir oversett. Å inkludere menneske som står utanfor kan i seg sjølv vere motiverande for verksemda. Verksemder som arbeider med inkludering styrkar dessutan evna til å legge til rette og ta vare på alle sine tilsette.

Arbeidsutprøving er eit godt verktøy for meir inkludering

Kunnskap og erfaring gjer det enklare å være ein inkluderande arbeidsplass. Arbeidsutprøving er eit godt tiltak for å skaffe seg slik erfaring. I samarbeid med NAV eller ei arbeidsmarknadsbedrift kan verksemder tilsette kandidatar i ein prøveperiode. I denne perioden forpliktar ingen av partane seg. NAV betaler lønna og kan bidra med støtte til hjelpemiddel og annan tilrettelegging. Etter prøveperioden kan verksemda fritt velje å tilsette kandidaten eller å avslutte arbeidsforholdet. Uansett utfall får både kandidaten og verksemda nyttig erfaring.

Utprøving gir høve til å bli kjend og finne ut om arbeidstakar og arbeidsgivar passar til kvarandre. Nokre verksemder brukar arbeidsutprøving til å rekruttere nye medarbeidarar. Dei fortel at dette er ein trygg måte å tilsette på, for begge partar. Verksemdene legg vekt på at dei ofte får dyktige, motiverte og lojale medarbeidarar på denne måten.

Dei gir følgjande råd til andre verksemder:

• Sørg for at NAV eller arbeidsmarknadsbedrifta kjenner verksemda godt. Dette aukar sjansen for at dei plukkar ut passande kandidatar.
• Krev at NAV eller arbeidsmarknadsbedrifta gjer eit godt forarbeid og førebur kandidatane.
• Som ved all rekruttering er det viktig med nok tid og ressursar til oppfølging og eventuell tilrettelegging.
• Ta initiativ til openheit om funksjonsevne og sørg for å avklare behov så tidleg som mogleg.
• Inkluder den tilsette i arbeidsmiljøet frå første dag.
• Gi ansvar og meiningsfulle arbeidsoppgåver.
• Sørg for å få tilbakemeldingar på korleis det går med den tilsette og tilpass eventuelt arbeidssituasjonen.
• Involver gjerne dei andre tilsette, for eksempel gjennom ei fadderordning. Tillitsvalte kan også være ei god støtte.

Inkluderande personalpolitikk

Sjansen for å lukkast er større om verksemda gjer inkludering til ein ambisjon i arbeidsgivar- og rekrutteringspolitikken. Ei inkluderande utforming av stillingsannonsar og jobbintervju er også viktige grep. Universell utforming av arbeidsplassen gjer tilrettelegging mykje enklare.

Mange gode støtteordningar for inkludering

NAV har ei lang rekke verkemiddel og støtteordningar som skal bidra til å inkludere menneske med nedsett funksjonsevne i arbeidslivet. Ta kontakt med eit NAV-kontor eller NAV Arbeidslivssenter for meir informasjon.

Kjelder

• Idébankens gode eksempel
• Arbeidsdepartementet: Jobbstrategi for personer med nedsatt funksjonsevne, 2013
• KS, LO kommune, Akademikerne, YS kommune, Unio: Best sammen om å øke sysselsettingen blant personer med redusert funksjonsevne